Հայաստանի հավաքականը ՖԻՖԱ-ի վարկանիշային աղյուսակում

Այսօր ՖԻՖԱ-ն հրապարակեց հավաքականների նոր վարկանիշային աղյուսակը: Վերջին երկու հանդիպումներից հետո մեր հավաքականը նահանջել է 2 տեղով և այժմ զբաղեցնում է 46-րդ հորիզոնականը: Չնայած նահանջին` արդյունքը բավականին պատկառելի է: Համեմատելու համար նշեմ, որ մեր հավաքականը այժմ ունի ավելի բարձր դիրք, քան աշխարհի կամ Եվրոպայի առաջնություններին բազմիցս մասնակցած Կամերունի, Չեխիայի, ՀԱՀ-ի, Էկվադորի, Ուկրաինայի և Լեհաստանի հավաքականները: ԱՊՀ երկրների հավաքականների մեջ Հայաստանը առաջ է թողել միայն Ռուսաստանին: Մեր տարածաշրջանից Վրաստանը զբաղեցնում է 67-րդ, իսկ Ադրբեջանը` 117-րդը: ՈՒԵՖԱ-ի գոտու երկրների շարքում Հայաստանը 26-րդն է:

Ուսումնասիրելով ՖԻՖԱ-ի վարկանիշային աղյուսակը` փորձեմ վերլուծել Հայաստանի հավաքականի անցած ուղին: Հայաստանի հավաքականը իր լավագույն արդյունքն ունեցել է անցած ամիս` 44-րդ տեղ, իսկ վատագույն արդյունքը` 159-րդ տեղ, գրանցվել է 1994թ. հունիսին, երբ վարկանիշային աղյուսակը լույս տեսավ առաջին անգամ: Հայաստանի հավաքականի լավագույն վերելքը եղել է 2007թ. հունիսին, երբ մեր հավաքականը առավելության հասավ Ղազախստանի, իսկ հետո` Լեհաստանի հավաքականի նկատմամբ և աղյուսակում բարելավեց իր արդյունքը միանգամից 48 հորիզոնականով: Հայաստանի հավաքականի միջին արդյունքը կազմում է 103.909:
Այս գրաֆիկում ներկայացված են Հայաստանի հավաքականի տարեկան միջին վարկանիշային ցուցանիշների դինամիկան:

Գրաֆիկում նկատում ենք, որ իր կազմավորման առաջին տարիներին Հայաստանի հավաքականը կայուն աճ է ցուցաբերել` 1994-1999թթ. ընթացքում 141-րդ տեղից հասնելով մինչև 85-րդ տեղ: Սակայն հաջորդող տարիները այնքան էլ բարեհաջող չեն եղել մեր համար: Չնայած 2005թ. մի փոքր բարելավմանը` 1999-2006թթ. կարելի է համարել նահանջի տարիներ: 2007թ. մեր ֆուտբոլիստները նոր աճ արձանագրեցին: 2008-2009թթ. մեր հավաքականի դրական տեղաշարժը աննշան էր, իսկ ահա 2010-2011թթ. վերելքը կարելի է տեսնել ոչ միայն այս գրաֆիկում, այլ նաև խաղադաշտում, ինչպես նաև մեր երկրպագուների աչքերում:
Հուսանք, որ առաջիկա ընկերական խաղերում մեր հավաքականը հաղթանակներ կտանի և առավել բարձր արդյունքով կավարտի տարին: Մենք հավատում ենք մեր հավաքականին!!!